ဒီတစ်ပတ် အားလပ်ရက်မှာ ဘယ်မှမထွက်ဖြစ်ဘူး။ ထမင်းဟင်းတောင် ဟိုနေ့ က ၀ယ်ထားတာတွေနဲ့ ပဲ ချက်ပြုတ် စားဖြစ်တယ်။ နှစ်ရက်လုံး အွန်းလိုင်းကနေ Lecture တက်နေရတော့ အချိန်တွေ ဘယ်လို ကုန်သွားမှန်းတောင် မသိလိုက်ဘူး။ မသိသေးတာတွေ အတော်များများ သိလိုက်တဲ့ အတွက် အကျိုးရှိရှိ အချိန်တွေ ကုန်သွားတယ်လို့ ပြောနိုင်မယ် ထင်တယ်။ ဘာစာမှ မဖတ် ဟိုလိုလို ဒီလိုလိုနဲ့  အားလပ်ရက်တွေ ကုန်နေတာ အတော်များနေပြီမဟုတ်လား။
စနေ နေ့ က မနက် ၁၀ နာရီလောက်ကနေ ညနေ ၃း၃၀ လောက်အထိ၊ တနင်္ဂနွေနေ့ ကတော့ မနက် ၁၁ နာရီလောက်ကနေ ညနေ ၅း၀၀ အထိ။ အဲ့လို စာမဖတ်တာကြာလို့ လားမသိဘူး၊ ထိုင်ရာမထ အာရုံစိုက်ပြီး နားထောင်ရတာ အတော် မလွယ်တဲ့ကိစ္စပဲ ဆိုတာကို သိလိုက်ရတယ်။ ဒါတောင် သက်သောင့်သက်သာ ကိုယ့်အိပ်ခန်းထဲက ကွန်ပြူတာရှေ့ မှာမို့  တော်ပါသေးတယ်။ Lecture ခန်းထဲမှာ ၈ နာရီလောက် အတန်းတက်ရမယ်ဆို တွေးတောင် မတွေးရဲတော့ဘူး။ အခြေအနေပေးရင် ကျောင်းဆက်တက်ရင် ကောင်းမလားဆိုတဲ့ အတွေးကို အတွေးတစ်ခုအနေနဲ့ ပဲ ရပ်ထားဖို့  စဉ်းစားနေပါပြီ။ ဒီနှစ်ရက်မှာ ညနေစောင်းလို့  နားလို့  ရပြီဆိုတဲ့ အချိန်တွေမှာ မခံမရပ်နိုင်အောင် ခေါင်းကိုက်နေတာ များတယ်။ ခေါင်းကိုက် ပျောက်ဆေး သောက်ပြီး အိပ်လိုက်မှ သက်သာရာရတဲ့ အခြေအနေ။ တစ်နေကုန်နီးပါး တတွတ်တွတ်ပြောဆို ရှင်းပြပေးရတဲ့လူတော့ ဘယ်လိုနေမလဲ မသိဘူး၊ ငြိမ်ငြိမ်လေး ထိုင်ပြီး နားထောင်ရသူ ကျွန်မတော့ အတော်ပင်ပန်းတယ်လို့  ခံစားသွားရပါတယ်။ တခြားဟာတော့ မြန်မာရုပ်ရှင် နည်းနည်းလည်း ကြည့်ဖြစ်လိုက်တာပဲ ရှိတယ်။
ဒီတစ်ပတ် အားလပ်ရက်တွေဟာ စိတ်ညစ်စရာ ထွေထွေထူးထူးလည်း မကြုံတွေ့ ရ၊ အိပ်ရေး၀၀လည်း အိပ်ဖြစ်၊ အစားမှန်မှန် စားဖြစ်၊ အကျိုးရှိတာတွေ လုပ်ဖြစ်ပြီး၊ အရင်က ကျွန်မ မသိသေးတဲ့ အကြောင်းအရာတွေ အတော်များမျာကို သိလိုက်ရတဲ့အတွက် အကျိုးရှိတဲ့ အားလပ်ရက်တွေလို့  ဆိုရပါမယ်။
No comments:
Post a Comment